Plete Palihog

Gitagaan ko ang taxi ug napulo ka baynte
“Keep the change”

Sa kamahal sa imong balay,
Makapangutana ko usahay,
Tag-pila ang kada tamak nako sa imong tiles?

Dyes mil? Dosi?
Sagdi.
Basta dato ka, ako pobre.

Basta sa pag abli ko
Sa imong pultahan
Naa dayon kas akong atubangan
Ga-ngisi

Wa kay paki

Nga ang v-neck nako inukay,
Imitation ahong nike,
Ang lipstick nako,
Wa didto, wa dinhi -
Halok lang ka gihapon, halok lang ka permi.

“Kumusta naman ka?” ning action pa kog sulti.
Kahibaw gud tang duha
Nga wa natoy nay paki
Mutawag raman ka ug gilaay.
Ug ako kung wa nay i-plete.

Hahay, piste.
Ing-ani nalang ta sigi.
Inom,
Sigarilyo,
Halok,
Uban pa,
Inom,
Sigarilyo,
Lakaw.
“Diay i-plete”

Wala na ko mag taxi.

Ning-para ko ug 17D.

Kanindot mag tan-aw sa gawas sa galihok nga sakyanan, sa?
Murag gi fast forward ang kalibutan.
Murag mabiyaan na tika.
HAHA.
Asa.

“Plete palihog” gihatag ko ang kwarta.
Ug sugod adto nga siyete, gisugdan ko pag-utro,
Ang pagsuway ug kalimot kanimo.

Pero usahay mag baktas ra bitaw ko.
Usahay sigarilyo ang gusto nako kuoton, imbis nga siyete, kay piste, kung kwarta ra ko nimo, kwarta ra sad ka: siyete!

Nganong nasuko man ko oi? Usa ra unta ka ka taxi.
Pero unsaon ta man, mag jeep man meng mga pobre,
Ug sorry
Nga sa akong pagkalimot
Ganahan ko
Siyete-siyte.

Asa na kaha ka nga 17D naabot?
Makapangutana bitaw ko usahay.
Basin nasukli na ka balik naho ba. Giatay,
Makalimot na bitaw jud unta ko,
Pila na to ka jeep, pila na ka “plete, oh”.

Pero tua,
Mga numero...
0-9-0-2…
“Ari ta sa balay?”
6-35
“Naa koy sigarilyo”
80-4-0.
Niadto one thousand, karon Marlboro?

Kayasa jud nimo.

Gitagaan ko ang taxi ug napulo ka baynte.
“Keep the change”

Karon, pila nasad ka siyete
Ang ipuno mos akong plete?

First Published: 8/15/2016